مدینہ منورہ کی تاریخی مسجد ’قبلتین‘ جہاں روزانہ سیکڑوں حجاج پہنچ رہے ہیں

مدینہ منورہ آنے والے حجاج اور زائرین یہاں کے تاریخی مقامات اور مساجد بھی دیکھ رہے ہیں۔
سرکاری خبررساں ادارے ’ایس پی اے کے مطابق مدینہ منورہ کی تاریخی مسجد ’قبلتین‘ میں روزانہ سیکڑوں حجاج پہنچ رہے ہیں اور یہاں نماز ادا کرتے ہیں ۔یہ وہ مسجد ہے جہاں دوران نماز قبلے کی تبدیلی کا حکم ہوا تھا۔
مسجد قبلتین مسجد نبوی کے مغرب میں 5 کلو میٹر کے فاصلے پر واقع ہے۔ یہ سب سے نمایاں تاریخی مقامات میں سے ایک ہے جہاں زائرین مدینہ میں اپنے قیام کے دوران جاتے ہیں۔
مسجد قبلتین کے تمام ترقیاتی کام مدینہ ڈیولپمنٹ اتھارٹی کے زیر نگرانی قبلتین کلچرل پروجیکٹ کے تحت کیے جاتے ہیں۔
مسجد قبلتین میں نمازیوں، حجاج اور عمرہ زائرین کی بڑی تعداد کے پیش نظر مسجد کے بیرونی صحنوں میں سائبان نصب کیے گئے ہیں۔
مسجد قبلتین میں توسیع کے بعد یہاں 3 ہزار تک نمازیوں کی گنجائش ہے۔
نئے منصوبے کے تحت بہت سی خدمات کا اضافہ کیا گیا ہے جس میں مسجد سے منسلک ثقافتی مرکز، پیدل چلنے والوں کے لیے راستے، نمازیوں کے لیے مسجد اور بالائی و بیرونی صحنوں کے درمیان آمد ورفت کے لیے ایسکلیٹرز اور لفٹ لگائی گئی ہیں۔