سنت ابراہیمی پر عمل کرکے اپنے کو شیطان سے محفوظ رکھیں : محمد اقبال

آگرہ- مسجد نہر والی کے خطیب محمد اقبال نے آج خطبۂ جمعہ میں لوگوں کو سنت ابراہیمی کو اپنی زندگی میں شامل کرنے پر زور دیا ،انہوں نے کہا کہ جس طرح حج کے دوران جمرات کے مقام پر علامتی طور پر شیطان کو کنکریاں مارتے ہیں ، یہ وہ مقام ہیں جہاں شیطان نے ابراہیم علیہ السلام کو بہکانے کی کوشش کی تھی جب وہ اللہ کے حکم پر اسمعیل علیہ السلام کو ذبح کے لیے لے جارہے تھے اس وقت ابراہیم علیہ السلام نے کنکری مارنے کا عمل کیا تھا ، جو اللہ کو پسند آیا اور اس سنت کو قیامت تک کے لیے قائم کردیا ، اسی طرح جب بھی اللہ کا حکم ادا کرتے وقت شیطان آدمی کے دل میں وسوسہ ڈالے یا شیطان نیک عمل کرنے سے روکنے کی کوشش کرے ،تو آدمی کو فوراً ہوشیار ہوجانا چاہیے ،اپنے خیالات کو فوراً کنکری مارنے کی کوشش کرے ،ایسے موقع پر جو چیز آدمی کو بچاتی ہے ،وہ دل میں اللہ تعالی کا ڈر ہے ،جب دل میں اللہ تعالٰی کا ڈر ہوگا تو آدمی اس شیطانی وسوسہ سے بچ جاتا ہے ،اسی بات کو قرآن میں اس طرح بتایا گیا ہے سورہ الا عراف آ یت نمبر ٢٠١ “بلا شبہ جو لوگ اللہ سے ڈرتے ہیں انہیں جب کوئی شیطانی وسوسہ چھو جاتا ہے ،تو چونک پڑتے ہیں ، اور فوراً صحیح صورت حال دیکھنے لگتے ہیں “ اس سے معلوم ہوا کہ جس دل میں اللہ کا ڈر ہوگا وہ شیطانی وسوسہ سے محفوظ رہے گا ، اس لئے جب بھی ایسی صورتحال ہو توسنت ابراہیمی کو یاد رکھیں ، اللہ تعالیٰ سے معافی مانگتے ہوئے اپنے کو درست کرنے کی کوشش کریں ، اللہ کا ڈر اور خوف پیدا کب ہوگا ، جب ہم اللہ کو ماننے کے ساتھ ساتھ اللہ “ کی “ماننے والے بن جائیں گے ، اللہ تعالیٰ ہم سب اپنے ماننے والی لسٹ میں شامل فرماے آمین