احمدیہ انٹر کالج میں آل انڈیا جمعیت القریش کی جانب سے ایک پریس کانفرنس کا اہتمام

آگرہ :احمدیہ انٹر کالج میں آل انڈیا جمعیت القریش کی جانب سے ایک پریس کانفرنس کا اہتمام کیا گیا جس میں تنظیم کے ضلع صدر محمد شریف قریشی نے کہا کہ تاج نگری سمیت ریاست اور ملک کے دیگر حصوں میں ہندوؤں اور مسلمانوں کے درمیان اتحاد کی ضرورت ہے، جسے دنیا میں محبتوں کا شہر کہا جاتا ہے، سماج دشمن عناصر اور آپسی ہم آہنگی کو تباہ کرنے والوں کے خلاف موثر کارروائی نہیں کی جا رہی ہے، جس کی وجہ سے سماج دشمن عناصر کی جانب سے جھگڑے بڑھنے لگے ہیں۔ تاج نگری اور دیگر علاقوں میں نام نہاد ہندو تنظیموں کے لوگ گوشت بیچنے والوں سے پیسے مانگتے ہیں، پیسے نہ دینے پر وہ بے گناہوں کو تھانے میں بند کر دیتے ہیںاور پولیس بغیر تصدیق اور ثبوت کے جلدی میں سنگین دفعات کے تحت مقدمات درج کر لیتی ہے۔ اس کو لے کر سماج میں ناراضگی ہے، مسلم نوجوانوں کو نشانہ بنایا جا رہا ہے، ہم اسے ہرگز برداشت نہیں کریں گے۔لوگوں کا مطالبہ ہے کہ حکومت اور انتظامیہ فرقہ واریت کو ہوا دینے والی قوتوں کے خلاف سخت کارروائی کرے۔
پریس کانفرنس میں ضلع صدر عدنان قریشی نے کہا کہ انہوں نے اتر پردیش کے وزیر اعلی یوگی آدتیہ ناتھ کے آگرہ میں دیے گئے اس بیان کی مذمت کی ہے جس میں انہوں نے کہا تھا کہ’’بٹیں گے تو کٹیں گے‘‘۔تاج نگری محبت کا شہر ہے لیکن اس طرح کے بیانات دے کر وزیر اعلیٰ ریاست کے عوام کی توجہ بیروزگاری اور مہنگائی سے ہٹانا چاہتے ہیں۔ عدالت کے مطابق 69 ہزار اساتذہ کی بھرتی میں پسماندہ طبقے کے امیدواروں کو نظر انداز کیا گیا ہے، اس بات کی تصدیق وزیر اعلیٰ کے پرائمری اسکولوں میں پسماندہ طبقے کے نوجوانوں کو ملازمتیں فراہم کرنے کے حکم سے ہوئی ہے۔ اس موقع پر محمد شریف، کالے بھائی، ڈاکٹر سراج قریشی، عدنان قریشی، حاجی قادر ، حاجی ببو، حاجی پپو حاجی وغیرہ موجود تھے۔