سابق مرکزی وزیر اور راجیہ سبھا کے رکن رام جی لال سمن نے بنگلہ دیش میں اقلیتوں ہونے والے حملے کو فرقہ وارانہ تشدد قرار دیا

آگرہ: بنگلہ دیش میں اقلیتوں، خاص طور پر ہندوؤں کو نشانہ بنا کر ہونے والے فرقہ وارانہ تشدد پر سابق مرکزی وزیر اور راجیہ سبھا کے رکن رام جی لال سمن نے سخت ردعمل ظاہر کرتے ہوئے کہا کہ اس تشدد کو فوری طور پر روکا جانا چاہیے۔
اس مسئلے کا واحد حل 1950 میں بھارت کے اس وقت کے وزیر اعظم پنڈت جواہر لال نہرو اور پاکستان کے وزیر اعظم لیاقت علی خان کے درمیان اقلیتوں کے تحفظ کے حوالے سے ہونے والا معاہدہ ہے۔ اس معاہدے میں دونوں ممالک کی حکومتوں نے اپنے اپنے ممالک میں اقلیتوں کے تحفظ کا وعدہ کیا تھا۔ (1950 میں موجودہ بنگلہ دیش پاکستان کا حصہ تھا اور مشرقی پاکستان کے نام سے جانا جاتا تھا)۔
یہ معاہدہ 8 اپریل 1950 کو دہلی میں طے پایا، جس پر جواہر لال نہرو اور لیاقت علی خان نے دستخط کیے تھے۔ اسے لیاقت-نہرو پیکٹ یا دہلی معاہدہ بھی کہا جاتا ہے۔ اس معاہدے کا مقصد دونوں ممالک میں امن اور باہمی ہم آہنگی کو یقینی بنانا تھا۔ اس معاہدے میں طے پایا تھا کہ دونوں ممالک اپنے اپنے ممالک میں اقلیتوں کے تحفظ کو یقینی بنائیں گے۔
حال ہی میں بنگلہ دیش کی حکومت نے تسلیم کیا ہے کہ سابق وزیر اعظم شیخ حسینہ کے عہدے سے ہٹنے کے بعد، خاص طور پر اگست کے مہینے سے، ملک میں اقلیتوں، خاص طور پر ہندوؤں، کو نشانہ بنایا جا رہا ہے۔ ڈھاکہ سے موصولہ میڈیا رپورٹس کے مطابق، عبوری حکومت کے سربراہ محمد یونس کے ترجمان نے ان اعداد و شمار کو ظاہر کیا اور کہا کہ ان حملوں کے سلسلے میں ستر افراد کو گرفتار کیا گیا ہے، جو ناکافی ہیں۔ تقریباً 17 کروڑ آبادی والے بنگلہ دیش میں ڈیڑھ کروڑ ہندو، دس لاکھ بدھ مت کے پیروکار، اور تقریباً پانچ لاکھ مسیحی اقلیتوں سے تعلق رکھتے ہیں۔
سماج وادی پارٹی دنیا بھر کے ممالک میں اقلیتوں کے مفادات کی بھرپور حامی ہے۔ اپنے اپنے ممالک میں اقلیتوں کے تحفظ کے لیے بھارت، بنگلہ دیش، پاکستان سمیت دنیا کے 150 سے زائد ممالک نے 1992 میں اقوام متحدہ کے ساتھ کیے گئے وعدے کی پاسداری کا عزم کیا ہے۔
اس سے قبل 1948 میں اقوام متحدہ کی جنرل اسمبلی نے یہ اعلان کیا تھا کہ اقلیتوں کے مفادات کے بارے میں غفلت برتی نہیں جا سکتی۔ اس کے بعد، 16 دسمبر 1966 کو اقوام متحدہ نے شہری اور سیاسی حقوق پر بین الاقوامی معاہدہ اپنایا۔ 18 دسمبر 1992 کو اقوام متحدہ کی جنرل اسمبلی نے اقلیتی گروہوں سے تعلق رکھنے والے افراد کے حقوق کے تحفظ کے لیے ایک قرارداد منظور کی۔
بھارت کو ان بین الاقوامی اصولوں کے تحت بنگلہ دیش میں اقلیتوں کے تحفظ کے معاملے کو عالمی سطح پر مؤثر طریقے سے اٹھانا چاہیے۔ اس موقع پر ڈاکٹر وریندر سنگھ چوہان، دھرمیندر یادو، مدن گرگ، سلیم شاہ، معین بابو جی، گورو یادو اور فیضان الدین عادل بھی موجود تھے۔