ہر مذہب اور ہر طبقے کے افراد کے لیے مفت طعام
آگرہ کینٹ کی معروف نوری مسجد میں ہر ہفتے کی طرح اس جمعہ کو بھی نمازِ جمعہ کے بعد لنگرِ اعلیٰ حضرت کا اہتمام کیا گیا۔ یہ سلسلہ گزشتہ پانچ برسوں سے جاری ہے، جو کہ سیّد صباحت میاں صاحب قبلہ کی سرپرستی میں اور مولانا مسرور رضا قادری کی نگرانی میں باقاعدگی سے انجام دیا جا رہا ہے۔
اس لنگر کی خاص بات یہ ہے کہ یہ مکمل طور پر سبزی خور (شاکاہاری) ہوتا ہے، تاکہ ہر مذہب، ہر طبقے اور ہر پس منظر کے لوگ چاہے وہ مسافر ہوں، غریب ہوں یا خوشحال—بلا جھجک اور برابری کے ساتھ اس میں شریک ہو سکیں۔
طعام کی تقسیم بغیر کسی امتیاز کے کی جاتی ہے، اور یہ خالصتاً انسانیت کی بنیاد پر انجام دیا جاتا ہے۔
اس موقع پر موجود افراد نے اسے اتحاد، اخوت اور بھائی چارے کی ایک بہترین مثال قرار دیا، اور نوری مسجد کی اس کاوش کو خوب سراہا۔
