لکھنؤ، بھارتیہ جنتا پارٹی کے زیرِ اہتمام وقف اصلاحات عوامی بیداری مہم کے تحت لکھنؤ میں منعقدہ ایک ورکشاپ سے خطاب کرتے ہوئے اقلیتی بہبود کے وزیرِ مملکت دانش آزاد انصاری نے وقف ترمیمی قانون کو ترقی پسند مسلمانوں کے لیے ایک “بڑی نعمت” قرار دیا۔
انہوں نے کہا کہ، “ملک میں وقف املاک کی بہتات کے باوجود، سابقہ حکومتوں نے کبھی بھی مسلمانوں کے بنیادی ڈھانچے کو مضبوط بنانے کی سمت میں سنجیدہ کوشش نہیں کی۔ آج جب وزیر اعظم نریندر مودی کی قیادت میں حکومت ایمانداری کے ساتھ مسلمانوں کی ترقی کو یقینی بنانا چاہتی ہے، تو کانگریس اور سماجوادی پارٹی جیسی جماعتیں اس میں رکاوٹ بن رہی ہیں۔ یہ واضح اشارہ ہے کہ ان جماعتوں کو مسلمانوں کی حقیقی ترقی سے کوئی سروکار نہیں۔”
انہوں نے زور دیتے ہوئے کہا کہ یہ لڑائی “خاص بمقابلہ عام” کی ہے۔ “کچھ بااثر لوگ نہیں چاہتے کہ وقف کی دولت کا فائدہ عام مسلمان کو ملے، مگر اس لڑائی میں وزیر اعظم نریندر مودی غریب، پسماندہ اور محروم طبقے کے مسلمانوں کے ساتھ کھڑے ہیں۔”
اس ورکشاپ میں وقف املاک کے شفاف انتظام، ان کے صحیح استعمال اور عام مسلمانوں تک اس کے فوائد پہنچانے کے حوالے سے تفصیل سے گفتگو ہوئی۔ اس موقع پر پارٹی کے سینئر رہنما، وقف امور کے ماہرین اور اقلیتی طبقے کے نمائندے بھی موجود تھے۔
