نئی دہلی، سماج وادی پارٹی نے جموں و کشمیر کے پہلگام علاقے میں 22 اپریل کو پیش آئے بہیمانہ دہشت گرد حملے کی شدید مذمت کی ہے۔ پارٹی نے اس حملے کو ایک “بزدلانہ اور غیر انسانی عمل” قرار دیا ہے، جس میں 26 بے گناہ شہریوں کی جانیں ضائع ہو گئیں جبکہ متعدد افراد شدید زخمی ہوئے۔
پارٹی کی جانب سے جاری کردہ ایک سرکاری پریس ریلیز میں کہا گیا ہے کہ یہ واقعہ ایک بار پھر ملک کی سیکیورٹی نظام کی ناکامی اور موجودہ حکومت کی نااہلی کو بے نقاب کرتا ہے، جو بار بار کشمیری عوام اور حساس علاقوں میں شہریوں کی حفاظت میں ناکام رہی ہے۔
سماج وادی پارٹی نے مطالبہ کیا ہے کہ اس سانحے کی فوری اور غیر جانبدارانہ تحقیقات کی جائیں اور ملوث دہشت گردوں اور ان کے سرپرستوں کو جلد از جلد انصاف کے کٹہرے میں لایا جائے۔
پارٹی نے مرکزی حکومت سے یہ بھی مطالبہ کیا ہے کہ ہر جاں بحق شہری کے خاندان کو 10 لاکھ روپے کا معاوضہ دیا جائے۔ پارٹی نے کہا کہ محض ہمدردی کے بیانات کافی نہیں، حکومت کو عملی اقدامات کرنے ہوں گے تاکہ متاثرہ خاندانوں کو سنبھالا جا سکے۔
پارٹی نے زخمیوں کی جلد صحتیابی کی دعا کرتے ہوئے کہا کہ دہشت گردی انسانیت پر براہِ راست حملہ ہے، اور اس کا مقابلہ قومی اتحاد، پختہ عزم اور سخت اقدامات سے ہی ممکن ہے۔
یہ بیان ریاست جموں و کشمیر کے صدر کی جانب سے، پارٹی کے جنرل سکریٹری نے جاری کیا۔
