بھارتی یوتھ کانگریس نے پہلگام دہشتگرد حملے میں جاں بحق ہونے والے شہریوں کو خراجِ عقیدت پیش کرنے کے لیے شمع بردار مارچ کا اہتمام کیا
نئی دہلی: بھارتی یوتھ کانگریس نے آج پہلگام میں دہشتگردوں کے ہاتھوں شہید ہونے والے معصوم شہریوں کو خراج عقیدت پیش کرنے کے لیے شمع بردار مارچ کا انعقاد کیا۔ اس مارچ میں بھارتی یوتھ کانگریس کے قومی صدر جناب اُدے بھانو چب کی قیادت میں بڑی تعداد میں کارکنان شریک ہوئے۔ مارچ کا آغاز یوتھ کانگریس کے دفتر سے ہوا، تاہم دہلی پولیس نے رائیسینا روڈ پر بیریکیڈنگ کر کے مارچ کو روک دیا۔ اس دوران کارکنان نے “پاکستان مردہ باد” کے نعرے لگائے اور شمعیں روشن کر کے شہداء کو خراجِ عقیدت پیش کیا۔
اس موقع پر بھارتی یوتھ کانگریس کے قومی صدر جناب اُدے بھانو چب نے کہا کہ پہلگام میں دہشتگردوں کے ہاتھوں معصوم سیاحوں کا قتل انتہائی افسوسناک ہے، ہم اس کی سخت الفاظ میں مذمت کرتے ہیں۔ یہ حملہ ایک بار پھر ثابت کرتا ہے کہ دہشتگردی انسانیت کی سب سے بڑی دشمن ہے۔ معصوم شہریوں پر یہ بزدلانہ حملہ نہ صرف شرمناک ہے بلکہ یہ ہمارے حفاظتی نظام کے لیے بھی ایک کھلا چیلنج ہے۔
انہوں نے کہا کہ ملک کے اندرونی حصوں میں دہشتگردوں کی دراندازی، معصوم جانوں کا ضیاع – یہ سب کچھ اس لیے ممکن ہو رہا ہے کیونکہ سرحد پار دہشتگرد تنظیموں کو پاکستان کی حکومت کی کھلی پشت پناہی حاصل ہے۔ آج ہم سب دہشتگردی کے خلاف متحد ہیں، لیکن اب برداشت کا نہیں بلکہ سخت اور مؤثر جواب دینے کا وقت ہے۔ ہمیں ہر دہشتگرد اڈے کو جڑ سے اکھاڑ پھینکنے کی ضرورت ہے – چاہے وہ سفارتی دباؤ ہو یا فوجی کارروائی، ہمیں ایک متوازن مگر فیصلہ کن رویہ اختیار کرنا ہوگا اور سب سے اہم یہ کہ شہداء کے خاندانوں کو انصاف دلانا ہوگا۔ یہ صرف ایک حملہ نہیں تھا، یہ انسانیت کے خلاف ایک جنگ ہے – اور ہمیں ہر حال میں جیتنا ہوگا۔
اُدے بھانو چب نے مزید کہا کہ کانگریس پارٹی دہشتگردی کے خاتمے کے لیے حکومت کے ساتھ مکمل تعاون، ہم آہنگی اور شراکت داری کے لیے پرعزم ہے۔ ہم نے ہمیشہ دہشتگردی اور علیحدگی پسندی کا ڈٹ کر مقابلہ کیا ہے۔ آج پورا ملک صدمے میں ہے اور ہم مطالبہ کرتے ہیں کہ مرکزی حکومت اس حملے کا منہ توڑ جواب دے۔
اس شمع بردار مارچ میں اُدے بھانو چب کے علاوہ دہلی یوتھ کانگریس کے صدر اکشے لاکرا، یوتھ کانگریس کے کئی قومی سیکریٹریز اور بڑی تعداد میں کارکنان نے شرکت کی۔
