قومی اردو کونسل کے صدردفتر میں’یونانی میڈیسن پینل‘ کی میٹنگ
نئی دہلی: آج قومی کونسل برائے فروغ اردو زبان،نئی دہلی کے صدر دفترمیں ’یونانی میڈیسن پینل‘ کی میٹنگ منعقد ہوئ،جس کی صدارت پینل کے چیرپرسن ڈاکٹر محمد خالد صدیقی(مشیر ہمدرد آرکائیو و سابق ڈائرکٹر جنرل سی سی آر یو ایم،نئی دہلی) نے کی۔جب کہ پینل کے ممبران میں پروفیسر اشہر قدیر(شعبہ کلیات اجمل خان طبیہ کالج،اے ایم یو،علی گڑھ)،ڈاکٹر محمد ذوالکفل(نیشنل انسٹی ٹیوٹ آف یونانی میڈیسن،غازی آباد) ،پروفیسر آسیہ سلطانہ(صدر شعبہ علاج بالتدبیر اجمل خان طبیہ کالج،اے ایم یو،علی گڑھ) حکیم وسیم احمد اعظمی (سابق ڈپٹی ڈائرکٹر،ریجنل ریسرچ انسٹی ٹیوٹ آف یونانی میڈیسن،لکھنؤ) ،ڈاکٹر وسیم احمد (شعبہ کلیات نیشنل انسٹی ٹیوٹ آف یونانی میڈیسن بنگلور) ، ڈاکٹر امان اللہ (ریسرچ آفیسر سائنٹسٹ IV،سی سی آر یو ایم،نئی دہلی)،ڈاکٹر اشفاق احمد (حیدر آباد) اور حکیم نازش احتشام اعظمی(میڈیکل آفیسر انچارج،نئی دہلی) شامل رہے۔
میٹنگ میں یونانی میڈیسن پینل سے متعلق ایجنڈے پر تبادلہ خیال کرتے ہوئے ڈائرکٹر قومی کونسل برائے فروغ اردو زبان، نئی دہلی ڈاکٹر محمد شمس اقبال نے کہا کہ اس پینل میٹنگ کا مقصد باہمی گفتگو کے ذریعے یونانی میڈیسن کے حوالے سے لوگوں میں Awareness کے لیے بہتر اقدامات کرنا ہے،کونسل یونانی میڈیسن کے تعلق سے ہمیشہ سنجیدہ رہی ہے،اس کی کوشش رہی ہے کہ حفظان صحت،امراض نسواں،امراض اطفال اور دیگرنئے امراض پر غور و خوض ہو اور ان پر کتابیں شائع ہوں،یہی وجہ ہے کہ کونسل نے امراض اطفال،کلیات ادویہ،ادویہ مفردہ،جراحیات عمومی،جراحیات نظامی اور کلیات امور طبیعیہ جیسی اہم کتابیں حال ہی میں شائع کی ہیں اور بعض کتابیں ابھی زیر طبع ہیں۔انھوں نے یونانی میڈیسن سے متعلق کتابوں کی اشاعت میں مزید بہتری کے لیے سینٹرل کونسل فار ریسرچ ان یونانی میڈیسن اور قومی اردو کونسل کے درمیان MoU دستخط کرنے کے تعلق سے بھی بات کی اورکہا کہ اس سے یونانی میڈیسن کے میدان میں ہمارے لیے مزید آسانیاں پیدا ہوں گی۔
میٹنگ کے صدر ڈاکٹر محمد خالد صدیقی نے ترقی اردو بیورو کے تحت یونانی میڈیسن سے متعلق شائع کتابوں کو بھی پیش نظر رکھنے کا مشورہ دیا اور کہا کہ اس سے یونانی میڈیسن کے حوالے سے بیورو اور کونسل کے مشترکہ کاموں کی نوعیت واضح ہو سکے گی،انھوں نے یونانی میڈیسن سے متعلق مسودات پر سنجیدگی سے غور کرنے کا مشورہ بھی دیا۔
میٹنگ میں پینل کے ممبران کی جانب سے یہ تجاویز بھی رکھی گئیں کہ شوگر،ہائ بلڈ پریشر اور نان کمیونیکیبل ڈیزیز (این، سی، ڈی)جیسے امراض کے حوالے سے یونانی میڈیسن کے میدان میں امکانات تلاش کیے جائیں۔ ماہنامہ ’اردو دنیا‘ اور ماہنامہ ’خواتین دنیا‘ میں طب سے متعلق مضامین ہر مہینے پابندی سے شائع کیے جائیں اورحفظان صحت اور این سی ڈی کے تعلق سے کلاسیکی متن کو بنیاد بنا کر کلاسیکی اپروچ کو بھی پیش نظر رکھا جائے۔ آخر میں کونسل سے حال ہی میں شائع طب کی چھ کتابوں جراحیات نظامی،کلیات ادویہ،ادویہ مفردہ،جراحیات عمومی،امراض اطفال اور کلیات امور طبیعیہ کی رسم رونمائی بھی عمل میں آئی۔
میٹنیگ میں ڈاکٹر شمع کوثر یزدانی اسسٹنٹ ڈائرکٹر (اکیڈمک)،ڈاکٹر مسرت (ریسرچ آفیسر) اور ذیشان فاطمہ(ریسرچ اسسٹنٹ) وغیرہ موجود رہیں۔