رہن کلاں ٹول پلازہ پر نمرتا دان کی قیادت میں کانگریس کارکنوں کا پرتپاک خیرمقدم، راہل گاندھی اور کانگریس کے حق میں نعرے
آگرہ: آل انڈیا کانگریس کمیٹی کے درج فہرست ذات (ایس سی) محکمہ کے قومی صدر اور اتر پردیش کانگریس کے نو مقررہ انچارج راجندر پال گوتم کے پہلے دورۂ اتر پردیش کے موقع پر بدھ کی صبح آگرہ کے رہن کلاں ٹول پلازہ پر ان کا والہانہ استقبال کیا گیا۔ آل انڈیا مہیلا کانگریس کی قومی سیکریٹری نمرتا دان کی قیادت میں کانگریس کارکنوں اور حامیوں نے گل پوشی کرتے ہوئے ان کا خیرمقدم کیا۔ اس دوران “راہل گاندھی زندہ باد”، “کانگریس پارٹی زندہ باد” اور “راجندر پال گوتم زندہ باد” کے نعروں سے پورا علاقہ گونج اٹھا۔
اس موقع پر میڈیا سے گفتگو کرتے ہوئے راجندر پال گوتم نے کہا کہ اتر پردیش میں بدانتظامی اپنے عروج پر ہے۔ دلتوں، پسماندہ طبقات اور خواتین کے خلاف مظالم میں مسلسل اضافہ ہو رہا ہے جبکہ قانون کی حکمرانی کمزور پڑ چکی ہے۔ انہوں نے الزام لگایا کہ حکومت عوامی مسائل سے توجہ ہٹا کر جمہوری اداروں کو کمزور کر رہی ہے اور اپوزیشن کی آواز دبانے کی کوشش کی جا رہی ہے۔
انہوں نے کہا کہ عوام اب تبدیلی کا فیصلہ کر چکے ہیں اور کانگریس قائد راہل گاندھی کی قیادت میں ریاست میں ایک مضبوط متبادل سیاسی قوت ابھر رہی ہے۔ ان کا کہنا تھا کہ 2027 کے اسمبلی انتخابات اتر پردیش کی سیاست کا رخ بدل دیں گے اور یہی تبدیلی آگے چل کر 2029 کے لوک سبھا انتخابات میں بھی نظر آئے گی۔
آل انڈیا مہیلا کانگریس کی قومی سیکریٹری نمرتا دان نے کہا کہ راجندر پال گوتم کی قیادت میں کانگریس سماجی انصاف، آئینی اقدار اور عوامی حقوق کے تحفظ کی جدوجہد کو مزید مضبوط کرے گی۔ انہوں نے کہا کہ اتر پردیش میں تبدیلی کی لہر شروع ہو چکی ہے اور کانگریس ہر طبقے کو انصاف، عزت اور مساوی مواقع فراہم کرنے کے عزم کے ساتھ میدان میں ہے۔
استقبالیہ پروگرام میں آگرہ میٹروپولیٹن کانگریس کے صدر امیت سنگھ دیواکر، ضلع صدر رامناتھ سکروار، سابق ضلع صدر دیویندر چِلّو، اشونی جین، منوج بوہرا، شانو خان، امیش جوشی، شینو خان، شیف خان، رفیق عرف بٹّا، شبّو خان وارثی، ذیشان خان، سندیپ پانڈے، ناصر جلیل سمیت سیکڑوں کانگریس کارکنان اور حامی موجود تھے۔
