آگرہ: حضرت شیخ سلیم چشتیؒ کی درگاہ پر چادر پوشی اور منّت کا دھاگہ باندھنے کے بعد سماجوادی پارٹی کے قومی صدر، سابق وزیرِ اعلیٰ اور رکنِ پارلیمنٹ اکھلیش یادو نے بابا صاحب ڈاکٹر بھیم راؤ امبیڈکر کے آئین کو ملک کی بنیاد قرار دیتے ہوئے مرکزی حکومت پر سخت تنقید کی۔
اپنی ایم پی اہلیہ ڈمپل یادو اور راجیہ سبھا رکن جیا بچن کے ہمراہ زیارت کے بعد بادشاہی گیٹ پر میڈیا سے گفتگو میں انہوں نے کہا:
“بابا صاحب نے ہمیں جو آئین دیا، اسی نے ہمیں جینے کا حق اور عزّت دی ہے۔ پی ڈی اے کے لیے بابا صاحب کا آئین قسمت کی کتاب ہے۔”
انہوں نے الزام لگایا کہ “ملک آئین سے چلتا ہے، مگر یہ لوگ ملک کو من کی مراد اور من کے قانون سے چلانا چاہتے ہیں اور چلا بھی رہے ہیں۔”
ایس آئی آر کے بہانے انتخابی سیاست کا الزام
اکھلیش یادو نے مرکز پر ایس آئی آر کے مسئلے کا سیاسی استعمال کرنے کا الزام لگایا۔ انہوں نے کہا:
“ایس آئی آر کے نام پر یہ لوگ ووٹ کاٹنے کی کوشش کر رہے ہیں۔ آپ زیادہ سے زیادہ ووٹ ڈالیں، اس بار پی ڈی اے حیران کر دینے والا نتیجہ دے گا۔”
انہوں نے کہا کہ طاقتور لوگ پی ڈی اے سے وابستہ افراد کی سرِعام توہین کر رہے ہیں، یہاں تک کہ سپریم کورٹ میں جوتا تک پھینک دیا گیا۔
آگرہ کی شناخت اور سپا کی پالیسیوں کا ذکر
سماجوادی پارٹی صدر نے کہا کہ آگرہ کی درگاہ، تاج محل، آگرہ کا پیٹھا، جوتا اور یہاں کے ہنرمند دنیا بھر میں پہچانے جاتے ہیں۔
انہوں نے دعویٰ کیا کہ آگرہ میٹرو سماجوادی پارٹی کی دین ہے اور آنے والے وقت میں آگرہ سے سَپا کے حق میں حیران کن نتائج دیکھنے کو ملیں گے۔
اکھلیش یادو نے کہا کہ یمنا ندی کو “گومتی ریور فرنٹ” کی طرز پر نیا روپ دیا جائے گا تاکہ آگرہ مزید خوبصورت اور عالمی معیار کا شہر بن سکے۔
بی جے پی پر طنز کرتے ہوئے کہا:
“بی جے پی والے کہتے تھے کہ گنگا بہار سے بہہ کر بنگال جائے گی، مگر اس بار الٹی گنگا بہے گی۔”
انڈیگو فلائٹ بحران پر بیان
انڈیگو کی پروازوں کے بحران پر تبصرہ کرتے ہوئے انہوں نے کہا کہ ملک کے صنعت کار اب حکومت کو اپنی طاقت کا احساس کرا رہے ہیں۔
آئین اور خواتین کے احترام کی بات
اکھلیش یادو نے کہا کہ ملک میں بہو بیٹیوں کا احترام “بابا صاحب کے آئین” کی بدولت محفوظ ہے۔
انہوں نے مزید کہا:“پچھلی بار ہم نے بھروسہ کیا تھا، لیکن اس بار کام اور جدوجہد اپنی طاقت خود دکھائیں گے۔”
