:
کلچرل ایجوکیشن سینٹر، علی گڑھ میں منعقد ہونے والے علی گڑھ اردو کتاب میلہ (22 تا 30 نومبر 2025) کے افتتاح سے قبل قومی کونسل برائے فروغِ اردو زبان کے ڈائرکٹر ڈاکٹر محمد شمس اقبال نے صحافیوں کو میلے کی اہم تفصیلات سے آگاہ کیا۔
ڈاکٹر اقبال نے کہا کہ یہ کتاب میلہ نئی نسل میں کتاب کلچر کو فروغ دینے کے لیے ایک مؤثر قدم ہے۔ انہوں نے بتایا کہ میلے کا افتتاح وائس چانسلر اے ایم یو محترمہ پروفیسر نعیمہ خاتون کے دستِ مبارک سے ہوگا۔
مہمانانِ اعزازی میں پدم شری پروفیسر سید ظل الرحمن اور رجسٹرار پروفیسر عاصم ظفر شامل ہوں گے۔ افتتاحی اجلاس میں کلیدی خطبہ ممتاز فکشن نگار جناب سید محمد اشرف پیش کریں گے جبکہ پروفیسر شافع قدوائی بھی اظہارِ خیال فرمائیں گے۔
اس میلے میں ملک بھر سے تقریباً پچاس پبلشرز شرکت کر رہے ہیں جن کا تعلق گجرات، تلنگانہ، مہاراشٹر، کشمیر، دہلی اور اتر پردیش وغیرہ سے ہے۔
کتب کی نمائش کے ساتھ ساتھ مختلف ادبی و ثقافتی پروگرام بھی ترتیب دیئے گئے ہیں جن میں مصنفین سے ملاقات، داستان گوئی، شامِ غزل، طرحی مشاعرہ، بچوں کے خصوصی پروگرام اور ثقافتی رنگ شامل ہیں۔
سر سید اکیڈمی کے اعزازی ڈائریکٹر پروفیسر شافع قدوائی نے اس میلے کو ایک قابلِ ستائش قدم قرار دیتے ہوئے کہا کہ اس سے اردو کتابوں کی رسائی مزید آسان ہوگی۔
کلچرل ایجوکیشن سینٹر کے کوآرڈینیٹر پروفیسر محمد نوید خان نے کہا کہ ادب اور ثقافت لازم و ملزوم ہیں، اور اس میلے کے ثقافتی پروگرام زبان و ادب کی روح سے جڑے ہوئے ہیں۔
پریس کانفرنس میں کونسل کے افسران کے علاوہ متعدد اہم شخصیات بھی موجود رہیں
