لکھنؤ، انڈس ویلی پبلک اسکول میں سالانہ اسپورٹس فیسٹیول “ایتھلیٹون 3.0” نہایت جوش و خروش کے ساتھ منعقد ہوا۔ اس تقریب کی صدارت اسکول کی پرنسپل محترمہ شیاملی سریواستو نے کی، جب کہ چیف گیسٹ کے طور پر مسٹر کنیہا لال (سیکریٹری، لکھنؤ ڈسٹرکٹ فٹبال ایسوسی ایشن) اور معزز مہمان کے طور پر بین الاقوامی ہاکی کھلاڑی مسٹر دیویندر سنگھ شریک ہوئے۔
نابینا فٹبال ٹیم کو خصوصی اعزاز
تقریب میں اتر پردیش موبیلیٹی انڈیا کے تحت نابینا فٹبال ٹیم کو ان کی محنت، صلاحیت اور قومی سلیکشن ٹرائلز سے قبل حوصلہ افزائی کے لیے خصوصی اعزاز سے نوازا گیا۔
کھلاڑیوں میں شامل تھے:
محبت (لکھنؤ)
مکّل (سہارنپور)
لکمان (لکھنؤ)
عبدالرحیم (لکھنؤ)
ارناو (لکھنؤ)
ان تمام کھلاڑیوں کو ڈریس کِٹ پیش کی گئی۔ اسی کے ساتھ ٹیم مینیجر جناب ایاز خان اچّھو اور ایسوسی ایشن کے صدر ای۔ دیواکر رائے کو بھی خصوصی طور پر سراہا گیا۔
پی ٹی آئی محمد ارشاد اور کوچ حضرات بھی موجود تھے۔
کھلاڑیوں کے لیے حوصلہ افزا پیغام
پروگرام کے اختتام پر جناب ایاز خان اچّھو نے اسکول انتظامیہ، پرنسپل، چیف گیسٹ اور تمام مہمانوں کا تہہ دل سے شکریہ ادا کیا۔ انہوں نے کہا کہ محترمہ سریواستو وقتاً فوقتاً معذور بچوں کی ہمت افزائی کرتی رہتی ہیں، جو قابلِ تحسین ہے۔
نابینا کھلاڑیوں سے خطاب کرتے ہوئے انہوں نے کہا:
“اندھیرا تمہارا ساتھی ہو سکتا ہے، لیکن پختہ ارادہ تمہاری روشنی ہے۔ قومی ٹرائلز میں سرخرو ہو کر تاریخ رقم کرو۔”
انہوں نے مزید کہا کہ جسمانی معذوری کوئی رکاوٹ نہیں، مضبوط حوصلہ اور عزم ہی روشن مستقبل کی ضمانت ہے۔
شمولیت اور حوصلہ افزائی کی جانب ایک مثبت قدم
اس موقع پر اسکول انتظامیہ نے کہا کہ ’’ایتھلیٹون 3.0‘‘ جیسے پروگرام نہ صرف کھیل کے فروغ کے لیے اہم ہیں بلکہ خصوصی ضرورت رکھنے والے نوجوانوں کے لیے نئی امید اور حوصلہ بھی پیدا کرتے ہیں۔ مستقبل میں بھی ایسی سرگرمیاں جاری رکھنے کا عزم ظاہر کیا گیا۔
