آگرہ | آل انڈیا کانگریس کمیٹی کی جنرل سیکریٹری و رکنِ پارلیمنٹ محترمہ پرینکا گاندھی واڈرا کی سالگرہ کے موقع پر کانگریس کے اقلیتی شعبہ کی جانب سے حضرت جلال بخاریؒ درگاہ پر چادر پوشی اور خصوصی دعا کا اہتمام کیا گیا۔ اس پروگرام کی قیادت اقلیتی شعبہ شہر صدر بشیر الحق راکی نے کی۔
اس موقع پر درگاہ پر محترمہ پرینکا گاندھی کی درازیِ عمر، صحتِ کاملہ اور روشن سیاسی مستقبل کے لیے دعا کی گئی، ساتھ ہی ملک میں امن و امان، بھائی چارہ اور آئین کی مضبوطی کے لیے بھی خصوصی دعائیں مانگی گئیں۔
چادر پوشی کے بعد خطاب کرتے ہوئے بشیر الحق راکی نے کہا کہ پرینکا گاندھی واڈرا ملک کی اُن باہمت قائدین میں شامل ہیں جو مظلوموں، اقلیتوں، خواتین اور کمزور طبقات کی آواز بے خوفی کے ساتھ بلند کرتی ہیں۔ انہوں نے کہا کہ آئین کی حفاظت، جمہوری اقدار کی بقا اور عوامی حقوق کے لیے پرینکا گاندھی کی جدوجہد ہر کانگریسی کارکن کے لیے مشعلِ راہ ہے۔ انہوں نے دعا کی کہ اللہ تعالیٰ انہیں مزید قوت، استقامت اور کامیابی عطا فرمائے تاکہ وہ ملک و قوم کی خدمت کا سفر جاری رکھ سکیں۔
اس موقع پر شاید احمد، شیخو میو، فیصل میواتی، توحید خان، عزیر خان، حسنین سمیت متعدد کانگریسی کارکنان اور معززین موجود رہے۔ پروگرام کا اختتام ملک کی خوشحالی، امن و آشتی اور قومی یکجہتی کی دعا کے ساتھ ہوا۔
کانگریس کارکنوں نے اس عزم کا اظہار کیا کہ پرینکا گاندھی واڈرا کی قیادت میں پارٹی عوامی مسائل کے حل اور جمہوری اقدار کے تحفظ کے لیے اپنی جدوجہد پوری طاقت کے ساتھ جاری رکھے گی۔
