”وہاب کھار کی شاعری کشمیر کا ایک اہم روحانی صحیفہ ہے/ ڈاکٹر ستیش ومل
سرینگر/ کے پی ایس/ معروف کشمیری صوفی بزرگ اور شاعر وہاب کھار کے کلام پر مشتمل مکمل شعری مجموعہ ”بیاضِ وہاب کھار“ کی باقاعدہ رونمائی اتوار کے روز پامپور تحصیل کے علاقے شار شالی میں واقع وہاب کھار ہال میں منعقدہ ایک خصوصی تقریب کے دوران کی گئی۔
کشمیر پریس سروس کے موصولہ بیان کے مطابق تقریب کی صدارت معروف دانشور اور ادیب ڈاکٹر ستیش ومل نے کی۔ اس موقعہ پر ممتاز شعرا، ادبا، محققین، دانشوروں، علما اور زندگی کے مختلف شعبوں سے وابستہ شخصیات نے شرکت کی۔ تقریب میں مجموعے کے چیف ایڈیٹر مشتاق برق، معروف ادیب و نقاد ڈاکٹر غلام نبی حلیم، مدیر فیاض عارف، پروفیسر جاوید احمد ڈار، معروف موسیقار کرشن جی لنگو اور ایڈووکیٹ عاشق حسین کے علاوہ دیگر اہم شخصیات بھی موجود تھیں۔تقریب کے دوران ایک خصوصی موسیقی کا پروگرام بھی منعقد کیا گیا، جس میں ممتاز لوک فنکاروں نے صوفیانہ کلام پیش کیا۔
اس موقع پر وہاب صاحب کھار کے منتخب اشعار بھی گائے گئے۔ پْرسوز اور روح پرور موسیقی نے تقریب کے روحانی اور ادبی ماحول کو مزید دلکش بنا دیا۔اپنے صدارتی خطاب میں ڈاکٹر ستیش ومل نے کہا کہ ”بیاضِ وہاب کھار“ وہاب کھار کے کلام کا ایک مستند اور تحقیقی مجموعہ ہے، جس میں اس روحانی شاعر کے تمام مستند شعری کلام کو شامل کیا گیا ہے۔ برسوں کی تحقیق کے بعد ماہرین کی ایک ٹیم نے، جس کی قیادت مشتاق برق نے کی، متن کی تصحیح اور تدوین کے ذریعے اس مجموعے کو مرتب کیا ہے۔
ڈاکٹر ستیش ومل نے کہاکہ وہاب کھار کی شاعری کشمیر کا ایک اہم روحانی صحیفہ ہے۔ درگاہِ وہاب کھار کے ادارہ اوقاف کی جانب سے کیا گیا یہ کام قابلِ تحسین ہے۔ کتاب محل کے شیخ وسیم نے بھی اس اشاعت کے معیار کو بہتر بنانے میں اہم کردار ادا کیا ہے۔ امید ہے کہ مستقبل قریب میں وہاب کھار کے منتخب کلام کے تراجم بھی کیے جائیں گے تاکہ یہ عظیم شعری سرمایہ وسیع حلقہ قارئین تک پہنچ سکے۔“