آستانہ حضرت میکش خانقاہ قادریہ نیازیہ میں محفلِ میلاد و نعتیہ نشست، بڑی تعداد میں عقیدت مندوں کی شرکت

آگرہ۔ میوا کٹرا واقع آستانہ حضرت میکش خانقاہ قادریہ نیازیہ میں حضرت امام جعفرِ صادقؒ کی ولادتِ باسعادت کی خوشی میں جشنِ ولادت کا شاندار انعقاد کیا گیا۔ پروگرام خانقاہ کے سجادہ نشین حضرت سید محمد اجمل علی شاہ کی سرپرستی میں منعقد ہوا۔

اس موقع پر محفلِ میلاد اور نعتیہ نشست کا اہتمام کیا گیا، جس میں شاہد ندیم، ماہر اکبرآبادی اور حاتِف اورنگ آبادی نے بارگاہِ رسالت مآب ﷺ میں نعتیہ کلام پیش کیا۔ محفل کے دوران درود و سلام کا نذرانہ بھی پیش کیا گیا اور ذکرِ رسول ﷺ سے فضا روحانی و نورانی ہوگئی۔

حضرت سید محمد اجمل علی شاہ نے موجود مریدین اور عقیدت مندوں سے خطاب کرتے ہوئے حضرت امام جعفرِ صادقؒ کی علمی، دینی اور روحانی خدمات پر روشنی

ڈالی۔ انہوں نے کہا کہ بزرگانِ دین کی زندگی ہمارے لیے علم، عمل، صبر، محبت اور انسانیت کا درس ہے۔ ہمیں ان کی تعلیمات پر عمل کرتے ہوئے معاشرے میں محبت، اخوت اور بھائی چارے کو فروغ دینا چاہیے۔

اس موقع پر حضرت سید عنبر علی شاہ قادری چشتی نیازی نے پروگرام میں تشریف لانے والے تمام مہمانوں کا استقبال کیا اور ان کا شکریہ ادا کیا۔

خانقاہ کے جانشین حضرت سید فیض علی شاہ قادری چشتی نیازی نے بھی محفل سے خطاب کیا۔ انہوں نے کہا کہ بزرگانِ دین کی تعلیمات انسان کو نیکی، محبت، اخوت اور انسانیت کی راہ دکھاتی ہیں۔ ان کی تعلیمات کو اپنی زندگی میں اپنانا ہی حقیقی عقیدت ہے۔

پروگرام کے دوران فاتحہ خوانی کی گئی اور شرکاء میں لنگر بھی تقسیم کیا گیا۔ دانش نیازی، تابش نیازی اور شارق نیازی نے میلادِ پاک پیش کیا اور ذکرِ رسول ﷺ کیا۔

بڑی تعداد میں عقیدت مند شریک ہوئے

جشنِ ولادت کی اس بابرکت محفل میں خصوصی طور پر سید شبّر علی شاہ، سید محمود العظمیٰ، سید علی، سید یوسف، سید سعود العظمیٰ، سید داؤد، سید مسعود احمد، حاجی امتیاز، برکت علی، زاہد حسین، سنی، شاداب، تاج بھائی، الیاس، اختر، جمال احمد، انس، حمزہ، لائق، اعجاز، عامر، اشرف سمیت بڑی تعداد میں مریدین، عقیدت مند اور اہلِ علاقہ نے شرکت کی۔

آخر میں ملک و ملت میں امن و امان، خوشحالی، ترقی، باہمی اتحاد و اتفاق اور انسانیت کی بھلائی کے لیے خصوصی دعا کی گئی۔