آگرہ، شاہی جامع مسجد آگرہ کے دارالافتاء میں منعقدہ علماء کی ایک اہم میٹنگ میں یہ فیصلہ کیا گیا ہے کہ اس سال 23 رمضان المبارک بمطابق 13 مارچ کو جمعۃ الوداع ادا کیا جائے گا۔ اس سلسلے میں شہر آگرہ کی تمام جامع مساجد کے ائمۂ کرام اور مسجد کمیٹیوں کے ذمہ داران کو باقاعدہ اطلاع دے دی گئی ہے۔
علماء نے کہا کہ یہ فیصلہ موجودہ قمری حساب اور دستیاب معلومات کی بنیاد پر کیا گیا ہے۔ تاہم اگر چاند کی رویت کے حوالے سے کوئی مختلف شرعی شہادت سامنے آتی ہے تو اس صورت میں رمضان المبارک کے ایام میں تبدیلی ممکن ہو سکتی ہے اور ایک جمعہ مزید بھی نصیب ہو سکتا ہے۔
اجلاس میں موجود علماء کرام نے عالمِ اسلام کے لیے خصوصی دعا بھی کی۔ انہوں نے دعا کی کہ اللہ تعالیٰ ماہِ رمضان کی برکتوں اور رحمتوں سے مسلمانوں کو مالا مال فرمائے اور آنے والی عید الفطر کو پوری امتِ مسلمہ کے لیے خیر و برکت کا ذریعہ بنائے۔
علماء نے مزید دعا کی کہ دنیا بھر میں جاری جنگیں ختم ہوں، امن و امان قائم ہو اور انسانیت کو سکون و سلامتی نصیب ہو۔
