علی گڑھ: ایسوسی ایشن آف مسلم پروفیشنلز کے علی گڑھ چیپٹر کی جانب سے گزشتہ روز شہر میں تین مختلف پروگراموں کا کامیاب انعقاد کیا گیا۔ ان پروگراموں میں اے ایم پی کے یوپی کلسٹر ہیڈ اکرم خان بطور مہمانِ خصوصی شریک ہوئے۔
پہلا پروگرام “اے ایم پی بیداری کیمپ” کے عنوان سے اشرف اپارٹمنٹ، حمزہ کالونی میں منعقد کیا گیا، جس میں بڑی تعداد میں لوگوں نے جوش و خروش کے ساتھ شرکت کی۔ اس موقع پر اے ایم پی کے مشن، مقاصد اور سماجی، تعلیمی و معاشی ترقی کے لیے اس کی خدمات پر روشنی ڈالی گئی۔ مقررین نے حاضرین سے اپیل کی کہ وہ اے ایم پی کے مشن سے جڑ کر ملت اور معاشرے کی تعمیر و ترقی میں اپنا کردار ادا کریں۔
دوسرا پروگرام میڈیکل روڈ واقع سفینہ اپارٹمنٹ میں منعقد ہوا، جہاں گلناز جہاں کی قیادت میں قائم کیے گئے اے ایم پی سلائی و کڑھائی سینٹر کا افتتاح عمل میں آیا۔ یوپی کلسٹر ہیڈ اکرم خان نے فیتہ کاٹ کر سینٹر کا باقاعدہ افتتاح کیا۔ انہوں نے اس موقع پر کہا کہ ایسے ہنر مندی کے مراکز خواتین کو خود کفیل بنانے اور انہیں باعزت روزگار کے مواقع فراہم کرنے میں اہم کردار ادا کرتے ہیں۔
تیسرا پروگرام اے ایم پی علی گڑھ چیپٹر کے سربراہ شہزاد حسین کی رہائش گاہ پر منعقد ہوا، جہاں اے ایم پی علی گڑھ ٹیم کے تمام اراکین کی ایک اہم میٹنگ کا اہتمام کیا گیا۔ اجلاس میں کلسٹر ہیڈ اکرم خان نے اراکین کے خیالات، تجاویز اور مسائل کو بغور سنا اور تنظیمی سرگرمیوں کو مزید مؤثر بنانے کے لیے ضروری رہنمائی فراہم کی۔
میٹنگ کے دوران اے ایم پی کے آئندہ پروگراموں، رکنیت سازی مہم، تعلیمی رہنمائی، اسکل ڈیولپمنٹ اور سماجی خدمت سے متعلق مختلف امور پر تفصیلی تبادلۂ خیال کیا گیا۔ تمام اراکین نے عزم ظاہر کیا کہ وہ اے ایم پی کے مشن کو زیادہ سے زیادہ لوگوں تک پہنچانے اور معاشرے کی فلاح و بہبود کے لیے متحد ہو کر کام کریں گے۔
پروگرام کے اختتام پر شرکاء نے اے ایم پی علی گڑھ چیپٹر کی سرگرمیوں کو سراہتے ہوئے امید ظاہر کی کہ تنظیم مستقبل میں بھی تعلیمی، سماجی اور فلاحی میدانوں میں اسی جذبے کے ساتھ خدمات انجام دیتی رہے گی۔
