آیوش معالجین کو AI اور جدید ٹیکنالوجی کی تربیت، عالمی ریکارڈ بنانے کی تیاری
آگرہ۔آیوش نظامِ علاج کے لیے ایک خوش آئند خبر ہے۔ بین الاقوامی آیوش کانکلیو 4.0 (نیپال ایڈیشن) جون 2026 میں کھٹمنڈو، نیپال میں منعقد کیا جائے گا۔ اس عالمی پروگرام کا اہتمام آگرہ کی معروف تنظیم سِوِک (کاؤنسل فار انٹیگریٹو ویدیہ انوویشن اینڈ کولیبوریشن) کر رہی ہے۔
سِوِک کے نمائندے ڈاکٹر ایم ایم قریشی نے بتایا کہ اس کانکلیو کا مقصد آیوش نظامِ علاج کو عالمی سطح پر مضبوط شناخت دینا اور آیوش معالجین کو مستقبل کے لیے تیار کرنا ہے۔ آیوروید، یوگ، نیچروپیتھی، یونانی، سدھا اور ہومیوپیتھی کے ماہرین ایک پلیٹ فارم پر جمع ہوں گے۔
کانکلیو کی خاص بات یہ ہوگی کہ آیوش ڈاکٹروں کو آرٹیفیشل انٹیلیجنس، ڈیجیٹل ہیلتھ اور جدید ٹیکنالوجی کی عملی معلومات دی جائیں گی۔ اس کے ساتھ سائنسی اجلاس اور تحقیقی مقالات بھی پیش کیے جائیں گے۔
اس موقع پر آیوش لیجنڈری، ایکسی لینس، رائزنگ اور انٹرپرائز ایوارڈز سے نمایاں خدمات انجام دینے والوں کو نوازا جائے گا۔ ساتھ ہی لیجنڈز ورلڈ ریکارڈز کے تحت ایک ہی پروگرام میں سب سے زیادہ آیوش معالجین کے ذریعے کلینیکل ڈائیگنوسس سیشن منعقد کر کے عالمی ریکارڈ بنانے کی کوشش ہوگی۔
اس کانکلیو میں بھارت سمیت 10 سے زائد ممالک اور 20 سے زیادہ ریاستوں سے 200 سے زائد مندوبین کی شرکت متوقع ہے۔ یہ پروگرام نیپال چیمبر آف کامرس کے اشتراک سے منعقد ہوگا، جس سے بھارت اور نیپال کے ہیلتھ اور ویلنیس شعبے کو نئی تقویت ملے گی۔
