نئی دہلی، 9 مئی :آل انڈیا صوفی سجادہ نشین کونسل کے زیر اہتمام “عالمی امن اور بھائی چارے کے لیے تصوف” کے عنوان سے ایک اہم اور روحانی مکالمہ کونسل کے مرکزی دفتر، نظام الدین ویسٹ، نئی دہلی میں کامیابی کے ساتھ منعقد کیا گیا۔
اس باوقار اجلاس میں دہلی اور ہریانہ سے تعلق رکھنے والے تقریباً 100 معزز سجادہ نشین حضرات، علمائے کرام، مشائخ عظام اور دینی و سماجی شخصیات نے شرکت کی۔ پروگرام میں مقررین نے تصوف کی تعلیمات کو موجودہ دور میں عالمی امن، مذہبی رواداری اور انسانی اخوت کے لیے نہایت ضروری قرار دیا۔
علمائے کرام اور صوفی مشائخ نے اپنے خطابات میں کہا کہ تصوف محبت، امن، بھائی چارہ، برداشت اور انسانیت کے احترام کا درس دیتا ہے۔ آج دنیا جن نفرتوں، تعصبات اور انتشار کا شکار ہے، ان کا مؤثر حل صوفیانہ تعلیمات میں موجود ہے۔
مقررین نے اس بات پر زور دیا کہ خانقاہیں ہمیشہ سے محبت، اخوت اور قومی یکجہتی کا مرکز رہی ہیں اور صوفیائے کرام نے ہر دور میں انسانیت کی خدمت اور امن کے فروغ کے لیے نمایاں کردار ادا کیا ہے۔
اجلاس میں ملک کی ترقی، قومی اتحاد اور پوری دنیا میں امن و خوشحالی کے قیام کے لیے خصوصی دعا بھی کی گئی۔ شرکاء نے اس عزم کا اظہار کیا کہ تصوف کے پیغامِ محبت و انسانیت کو گھر گھر پہنچایا جائے گا تاکہ معاشرے میں ہم آہنگی اور بھائی چارے کو مزید فروغ حاصل ہو۔
