آگرہ۔ سنجے سنگھ کی قیادت میں جاری ’’روزگار دو، سماجی انصاف دو‘‘ پدیاترا کا چوتھا مرحلہ اب برج خطے میں منعقد کیا جائے گا۔ یہ اطلاع برج خطہ کے صدر ڈاکٹر ہردیش چودھریی نے دی۔
انہوں نے بتایا کہ یہ پدیاترا تاج نگری آگرہ سے شروع ہو کر ہاتھرس کے راستے کانہا کی نگری متھرا میں اختتام پذیر ہوگی۔ اس یاترا کے ذریعے رکن پارلیمنٹ سنجے سنگھ صوبے کے نوجوانوں سے جڑے اہم مسائل—بڑھتی بے روزگاری، پرچے لیک ہونے کے واقعات، رکی ہوئی بھرتیاں اور سماجی انصاف—کو اجاگر کرتے ہوئے عوام سے براہِ راست رابطہ کریں گے۔
ضلعی صدر سدھارتھ چترویدی نے بتایا کہ پدیاترا کی تمام تیاریاں مکمل کر لی گئی ہیں۔ راستوں کے تعین، عوامی رابطہ مہم، جلسوں اور کارکنان کی شرکت کے لیے وسیع پیمانے پر انتظامات کیے گئے ہیں تاکہ زیادہ سے زیادہ لوگ اس مہم سے جڑ سکیں۔
پدیاترا کا آغاز سنجے پلیس واقع شہید سمارک سنجے پلیس پر شہداء کو خراجِ عقیدت پیش کرنے سے ہوگا۔ اس کے بعد راجامنڈی میں واقع کدوائی پارک میں ایک عظیم الشان جلسہ عام منعقد ہوگا، جہاں سنجے سنگھ عوام سے خطاب کریں گے۔ اس کے بعد یہ پدیاترا متھرا تک بلا تعطل جاری رہے گی۔
وہیں ترجمان پرشانت یادو نے کہا کہ یہ پدیاترا صوبے کے نوجوانوں اور محروم طبقات کی آواز کو مضبوط کرنے کی ایک اہم کوشش ہے۔ انہوں نے کہا کہ آج کا نوجوان روزگار اور باعزت مواقع کا مطالبہ کر رہا ہے اور یہ یاترا اسی جدوجہد کو ایک نئی سمت دے گی۔
پارٹی عہدیداران نے صوبے کے نوجوانوں، طلبہ، کسانوں اور عام عوام سے اپیل کی ہے کہ وہ اس پدیاترا میں شریک ہو کر اپنے حقوق کی آواز بلند کریں۔
اس موقع پر تاج الدین خان، سنجے بھارتی، للت ساہنی، ونود کمار، ہرش کمار، ارون گہلوت، موہت اگروال، اندرا کمار ورما سمیت متعدد کارکنان موجود رہے۔
