لکھنؤ،:اتر پردیش کانگریس کمیٹی کی جانب سے نہرو بھون، لکھنؤ میں منعقدہ اقلیتی سماج کنونشن میں راجیہ سبھا رکن اور اقلیتی کانگریس کے قومی صدر عمران پرتاپ گڑھی نے بڑا بیان دیتے ہوئے کہا کہ “کانگریس ہی اقلیتوں کا اصل گھر ہے اور اب وقت آ گیا ہے کہ نفرت کی سیاست کو ختم کیا جائے۔” انہوں نے کہا کہ عوام اب بیدار ہو چکی ہے اور آنے والے وقت میں تبدیلی یقینی ہے۔
اس موقع پر نو مقررہ صوبائی صدر اقلیتی کانگریس و سابق رکن اسمبلی سہیل انصاری نے باضابطہ طور پر عہدہ سنبھالا۔ کنونشن میں کانگریس کے سینئر رہنماؤں نے بی جے پی حکومت پر سخت تنقید کرتے ہوئے اقلیتی سماج سے اپیل کی کہ وہ 2027 کے انتخابات میں متحد ہو کر فیصلہ کن کردار ادا کریں۔
اتر پردیش کانگریس کے صدر اجے رائے نے علیل ہونے کے باعث اسپتال سے ویڈیو کانفرنسنگ کے ذریعے خطاب کیا اور جلد صحت یاب ہو کر دوگنی قوت کے ساتھ عوام اور اقلیتی سماج کی آواز بلند کرنے کا عزم ظاہر کیا۔
آل انڈیا کانگریس کمیٹی کے جنرل سکریٹری اور یوپی انچارج اویناش پانڈے نے کہا کہ ملک کی آزادی میں اقلیتی سماج کا اہم کردار رہا ہے، لیکن موجودہ بی جے پی حکومت میں انہیں مسلسل نشانہ بنایا جا رہا ہے۔ انہوں نے الزام لگایا کہ بی جے پی سماج کو تقسیم کر کے ملک کو کمزور کر رہی ہے اور ایسے حالات میں کانگریس کو مضبوط کرنا وقت کی اہم ضرورت ہے۔
اپنے خطاب میں عمران پرتاپ گڑھی نے کہا کہ بی جے پی حکومت عوامی مسائل سے توجہ ہٹانے کے لیے مذہب کی سیاست کر رہی ہے۔ انہوں نے کہا کہ 2024 میں عوام نے آئین بدلنے کے غرور کو توڑ دیا اور آنے والے انتخابات میں بھی عوام جواب دینے کے لیے تیار ہے۔ انہوں نے اقلیتی سماج سے اپیل کی کہ وہ کانگریس کے ساتھ مضبوطی سے جڑیں۔
دہلی کانگریس کے انچارج قاضی نظام الدین نے کہا کہ ملک کو 56 انچ کے سینے نہیں بلکہ 56 انچ کے دل کی ضرورت ہے۔ انہوں نے راہل گاندھی کو ملک کے لیے ضروری قیادت قرار دیتے ہوئے کانگریس کو مضبوط کرنے کی اپیل کی۔
بہار اسمبلی میں کانگریس مقننہ دل کے لیڈر شکیل احمد نے کہا کہ ملک میں نفرت کا ماحول پیدا کیا جا رہا ہے اور اقلیتوں کی حب الوطنی پر سوال اٹھائے جا رہے ہیں۔ انہوں نے کہا کہ سماج میں زہر گھولنے والی طاقتوں کے خلاف متحد ہو کر لڑنا ہوگا۔
صوبائی صدر اقلیتی کانگریس سہیل انصاری نے کہا کہ اتر پردیش ہمیشہ ملک کی سیاست کو سمت دیتا رہا ہے اور 2027 کا انتخاب تاریخی ہوگا۔ انہوں نے اقلیتی سماج سے اپنی طاقت پہچاننے اور کانگریس کے ساتھ کھڑے ہونے کی اپیل کی۔
رکنِ پارلیمنٹ تنوج پونیا نے بھی بی جے پی پر ذات اور مذہب کی بنیاد پر امتیاز برتنے کا الزام لگایا اور کہا کہ ایسے حالات میں کانگریس کے ساتھ مضبوطی سے کھڑا ہونا ضروری ہے۔
پروگرام میں کانگریس کے کئی سینئر رہنما، عہدیداران اور صوبہ بھر سے آئے ہزاروں کارکنان موجود رہے۔ اس موقع پر بشیر الحق، عدنان اشرف سمیت دیگر معزز شخصیات بھی شریک رہیں۔
کنونشن میں تنظیم کو مضبوط کرنے اور 2027 کے اسمبلی انتخابات کی تیاریوں کے حوالے سے واضح پیغام دیا گیا کہ کانگریس زمینی سطح پر اپنی گرفت مضبوط کرنے کے لیے پوری طرح تیار ہے۔
